Badatoz “Irabazi Arte”ren laugarren denboraldiko aurrestreinaldiak!
“Irabazi Arte!” telesailaren laugarren denboraldia ate joka dago, eta aurrestreinaldien datak ere baditugu jada. Lehen hitzordua Bilbon izango da, urtarrilaren 26an, Euskalduna Jauregian, 17:00etan. Gainera, Printzesak futbol-taldeko protagonistak gertutik ikusi eta beraiekin argazkiak ateratzeko aukera ere izango dugu. Eskuratu Bilboko aurrestreinaldira joateko zure sarrera honako esteka honetan: LORTU ZURE SARRERA
Gainera, datozen asteotan izango dira beste hainbat aurrestreinaldi ere, otsailaren 2an Donostian, Victoria Eugenian, eta otsailaren 9an Gasteizen, Europa Jauregian. Bi emanaldi horietarako sarrerak laster jarriko dira eskuragai.
Otsailaren 14tik aurrera, MAKUSIn ikusgai
Aurreko denboraldian hainbat galdera erantzunik gabe geratu ziren: Arene berriro ibiltzeko gai izango da? Jonek Martxeloren eta Alaitzen azpijokoak agerian utziko ditu? Zer gertatuko da Lukarekin jipoia jaso ondoren? Bada, bizitza berrira moldatu beharko dira protagonistak eta oztopoz beteriko bideari aurre nola egingo dioten ikusiko dugu otsailaren 14tik aurrera MAKUSI plataforman.
Sarrerak MAKUSI klubeko kideentzat
MAKUSI Klubekoa izateagatik, gainera, zozketa berezi baten parte hartu ahalko duzue, Bilboko aurrestreinaldira joateko 10 sarrera laukoitz banatuko ditugu kideen artean. Adi egon!
